PRADET hanesan ONG Nasional estabelese hodi hala’o knar iha area saude mental no foku atendementu direta ba ema sira ne’ebé sofre; stress, trauma inklui violensia domestika, asaltu sexual, abusu sexual no trafiku umanu iha Timor Leste.

Iha fulan Jullu 2019, PRADET liu husi program Fatin Hakmatek iha rejiaun Leste servisu hamutuk ho autoridade lokal no komunidade iha Munisipiu Baucau-Postu-Administrativu Venilale, suku Fatulia  hala’o servisu karitativa/voluntariu hodi hari uma rua ba beneficiariu/kliente nain rua ne’ebé konsidera  kbit laek kona-ba fatin atu hela. Beneficiariu nain rua ne’ebé hetan ajudus uma refere, ida kondisaun moras psikosocial no ida abandonadu. Beneficiariu nain rua ne’e PRADET fo asistensia psikososial hodi halo atividade fila-liman iha sira nia hela fatin hanesan parte rehabilitasaun base komunidade atu ajuda no motiva sira ba rekoperasaun vida ekonomia no moris sosial.

Asaun ne’e hanesan tratamentu psikososial atu hadignu vida moris beneficiariu rua ne’e nian tamba sira nia kondisaun hela fatin ne’ebé la-favorese no konsidera vulnerabel tebes.

Uma rua ne’ebé oferese ba beneficiariu kbit laek ne’e hetan kontribuisaun servisu volutariamente direta husi autoridade ho komunidade lokal iha suku Fatulia. Uma rua refere konstroi ho materiais lokal ho medida 8 x 8 no kompostu husi kuartu 3, sala jeral 1, dapur 1 no haris fatin/toilet 1. PRADET fo apresiasaun masimu ba autoridade lokal no komunidade sira ne’ebé hatudu ona komitmentu diak  no ne’e hanesan ezemplu positivu ba komunidade sira iha fatin seluk. Iha prosesu entrega uma rua ne’e ba beneficiariu ho sira nia familia, hetan partisipasaun direta husi Presidente Autoridade Munisipiu Baucau, Komandante PNTL Munisipiu Baucau no autoridade lokal sira.