Organizasaun PRADET liu husi Programa Assistensia Moras Mental (PAMM) konvida membru familia sira ne’ebé hasoru problema moras mentál, hodi fo hanoin no fahe esperiensia oinsá bele eduka familia sira ne’ebé hasoru problema moras mentál iha komunidade. Atividade family Link ne’e loke husi Diretor Executivo PRADET nomos oradores nain rua husi Acute care no doutor husi Klinika Bairopite. Iha biban hanesan Diretor Executivo PRADET informa ba familia no partisipantes katak husu ba ita hotu tau hanoin no forsa hamutuk hodi ajuda no tulun ba maluk sira ne’ebé hetan situasaun moras mental, importansia husi atividade ne’e oinsa fahe esperensia ba malu kona-ba prosesu rekuperasaun ba maluk sira ne’e hetan moras mental no balun kondisaun diak ona  durante hetan asistensia iha centru reabilitasaun psikososial PRADET dehan Diretor Executivo  iha salaun Xanana Gusmão Reading Room, sesta 13/11/2020.

Konselor Richa N. Estrela akresenta “Tratamentu moras mentál hanesan mós tratamentu fiziku, entaun bainhira kliente sira hetan tratamentu liu-liu terapia iha  sentru rehabilitasaun iha atividade sira ne’ebé ami offerese hamutuk pakote hitu ne’ebé bai-bain halo iha sentru reabilitasaun, no pakote hirak ne’e mak hanesan, pakote ijéniku, meditasaun, tein, arte, alfabétika, suku, no pakote jardineru.

“Iha ami nia fatin ami hahú asesmentu, ami konsidera tebes kliente nia desizaun, ami halo tratamentu iha sentru rehabilitasaun PRADET bazeia ba diagnostiku ne’ebé doutor sira fo, ami mós ko’alia ba nia maske nia moras mentál maibé ne’e konfenensialidade, tanba maské nia kondisaun nune’e nia neon sempre lao no hanoin mak fahe ba rua, dalabarak liu hanoin negativu no ituan liu hanoin pozitivu,” dehan Richa Nela Estrela haktuir.

kliente sira ne’ebé mai kontinua atividade iha sentru reabilitasaun normalmente husi klínika Bairo-pite no HNGV, tanba kliente sira tenke ba hasoru uluk doutór hodi hetan  tratamentu medikamentu ba moras ne’e hodi detekta nia diagnóstiku hafoin familia sira mak deside no hetan referral husi doutor no lori mai sentru reabilitasaun.

Iha fatin hanesan, Koordenadór programa asisténsia moras mentál (PAMM) Nicolau V. Ximenes informa, iha 2017 PRADET hamosu hanoin ida ho atividade hanaran Dalan Ninin, hodi hari’i konfiansa ho maneira, vizita sira, halo komunikasaun ho sira fornese mós hahan báziku, husi ne’e Ekipa PAMM kontinua oinsa mak bele buka nia familia hodi konekta no lori ba fasilidade saude atu hetan tratamentu.

“Husi dadus ne’ebé iha, ekipa servisu rekolla ona ema hamutuk 98 hahú programa Dalan Ninin ne’e estabelese, maluk sira ne’ebé iha dalan ninin mai husi munisipiu diferente, signifika katak ita nia maluk ne’ebé abandona barak ona no númeru aas tebes iha Dili”, dehan Nicolau V. Ximenes.

Nia haktuir tan, dezafius ne’ebé PRADET hasoru mak wainhira halo vizita ba maluk moras mentál sira iha dalan ninin, iha preokupasaun husi ema balun katak tenke hari’i uma provizóriu ida ba sira, maibé sé mak halo atendimentu akomulasaun provizoriu ruma hodi hetan tratamentu dignu depois hodi fila ba familia, nune’e dezafiu ne’e mak ema hotu nia preokupasaun.

“Husi maluk 98 ne’ebé ami hasoru iha nain 6 mak ba fali uma ona, maibé nain haat hela metin iha uma, nain rua sei lao sai husi uma ba iha dalan ninin, tanba ami lori familia, familia sira sempre hato’o sira nia preokupasaun katak loron oan ba eskola, aman ba servisu, inan ba fila liman entaun sé mak atu kontrola nia hodi fó aimoruk”.

 

Editor

Media Officer PRADET